سلێمانی، ١٧ نیسان ٢٠٢٥

لە ڕۆژی جیهانی ژینگەی کوردستان، خوێندکارانی خوێندنگەی شەهید جەبار هەستان بە ڕێکخستنی ئیڤێنتێک بۆ ئاماژەدان بەو مەترسییە ژینگەییانەی ڕووبەڕووی کۆمەڵگاکەمان دەبێتەوە و هەروەها خستنەڕووی کۆمەڵێک چارەسەری نوێ  لە پێناو بنایتنانی داهاتوویەکی باشتر.

لە چالاکییەکەدا سەرنج خرایە سەر پێشکەشکردنی ژمارەیەک سیمینار و پڕۆژەی تایبەت لەلایەن خوێندکارانەوە، دەربارەی بابەتەکانی ڕێگریکردن لە پیسبوونی ژینگە، پاراستنی سەرچاوە سروشتییەکان و ژینگەی شارەکان. لە ڕێگەی ئەم جۆرە چالاکییانەوە خوێندکاران بەرپرسیارێتی و هەڵوێستی خۆیان نیشان دەدەن بەرامبەر گرنگی پاراستنی ژینگە.  

خوێندنگەی شەهید جەبار ناوەندێکی پەروەردەیی تایبەتی بێ بەرامبەرە، لە ساڵی ٢٠٠١ دامەزراوە بە مەبەستی ڕەخساندنی هەلی خوێندنی یەکسان بۆ خوێندکاران.  

لە ڕێگەی ئەم دەستپێشخەرییەوە خوێندکارانی خوێندنگەی شەهید جەبار، پابەند بوونی خۆیان بە پاراستنی ژینگە و تواناکانیان بۆ بەشداری کردن بە شێوەیەکی چالاکانە لە دروستکردنی گۆڕانکاری لە کۆمەڵگادا دووپاتکردەوە.

سلێمانی، ٢٦ نیسان ٢٠٢٥ 

لە چوارچێوەی پڕۆژەی ئارای سەر بە منداڵپارێزی کوردستان گەشتێک ڕێکخرا بۆ منداڵانی توشبوو بە شێرپەنجە لە نەخۆشخانەی هیوا لە شاری سلێمانی. منداڵەکان هاوشانی خێزانەکانیان ئامادەبوون لە نمایشی شانۆگەری (ماسییە ڕەشە بچووکەکە)، کە ئامانجی هاندانی منداڵان بوو تا هیوایان لەدەست نەدەن و بوێر بن و بەردەوام بن لە هەوڵدان و کۆشش تا بتوانن زاڵبن بەسەر کاتە سەختەکاندا، هەروەها دەرفەتێک بوو بۆ منداڵان تا بوانن چێژ ببینن لە چیرۆکێکی پەروەردەیی هەمەڕەنگ و پەیامدار.لە کۆتاییدا منداڵان و خێزانەکانیان ڕۆژێکی خۆشیان بەسەر برد و یادگاری خۆشیان تۆمارکرد و بۆ چەند ساتێک دورکەوتنەوە ژینگەی نەخۆشخانە.  

بۆ زانیاری زیاتر دەربارەی پڕۆژەی ئارا سەردانی ئەم لینکە بکە

١٤ نیسانی ٢٠٢٥

لەگەڵ ڕۆژی جیهانی پاراستنی ژینگە، منداڵپارێزی کوردستان لە مەڵبەندی ڕۆشنبیری کازیوەی منداڵان-چوارتا هەستا بە ئامادەکردنی چالاکییەکی سوودبەخش و پڕاوپڕ لە خۆشی بۆ منداڵانی سەنتەرەکە و منداڵانی باخچەی ساوایانی چوارتا.

ئەم چالاکییە پێکهاتبوو لە سیمینارێکی پەروەردەیی سەبارەت بە گرنگی پاراستنی ژینگە و کۆمەڵێک چالاکی نافەرمی و پێشکەشکردنی دیاری بە منداڵان بە مەبەستی زیاتر هاندانیان بۆ بایەخدان بە سروشت و پاکڕاگرتن و سەوزکردنی ژینگەی دەوروبەریان.

منداڵپارێزی کوردستان، لەڕێگەی ئەم جۆرە دەستپێشخەرییانەوە هەوڵ دەدات بۆ پەروەردەکردنی نەوەیەکی ژینگە دۆست لە داهاتوودا.

سلێمانی، ١٣ نیسان ٢٠٢٥

عێراق – منداڵپارێزی کوردستان بە هاوکاری بەشی خێرخوازی گروپی کۆمپانیاکانی قەیوان و شاری پزیشکی ئەنوەر شێخە تیمێکی نەشتەرگەری دڵی ئیتاڵییان بانگهێشتکرد بۆ هەرێمی کوردستان. تیمەکە لە ڕێکەوتی ٥ تا ١٣ نیسانی ٢٠٢٥ نەشتەرگەری و پشکنینیان ئەنجامدا بۆ ئەو منداڵانەی نەخۆشی زگماکی دڵیان هەیە.

تیمە ئیتاڵییەکە پێکهاتبوون لە نۆ کەسی شارەزا لە بوارەکانی نەشتەرگەری دڵی منداڵان، پزیشکی بێهۆشکەر، پزیشکانی بەشی چاودێری چڕ، پەرستار و پێرفیوژنیست کە سەردانی شاری پزیشکی ئەنوەر شێخەیان کرد لە شاری سلێمانی. تیمەکە پشکنینیان بۆ ٢٧ منداڵ کرد و شەش نەشتەرگەری ئەنجامدرا، هەندێک لەو منداڵانەی چارەسەریان وەرگرت کێشیان ١٠  کیلۆ بوو و بە خۆشحاڵییەوە بەرەبەرە هەنگاو دەنێن بەرەو چاکبوونەوە. یەکێک لەو نەشتەرگەرییانەی ئەنجامدران حاڵەتێکی هەرە دەگمەن و هەستیار بوو، منداڵەکە دڵی لەدەرەوەی قەفەزەی سنگی بوو.

لە میانەی سەردانەکەیان چاویان کەوت بە خاتوو سارا ڕەشید، سەرۆکی منداڵپارێزی کوردستان و کۆبوونەوەیەکیان ئەنجامدا بۆ تاوتوێکردنی کار و پڕۆژەی هاوبەش لە داهاتوودا. لە گفتوگۆکاندا جەخت کرایەوە لە بەردەوام بوون لە هەوڵە هاوبەشەکان بۆ ئەنجامدانی نەشتەرگەری زیاتر و بەکارخستنی سەنتەرە نوێیەکەی دڵی منداڵان لە سلێمانی. هەروەها هەردوو لایەن تاوتوێی چۆنیەتی بەشداربوونی تیمە ئیتاڵییەکەیان کرد لەم پڕۆسەیەدا تا بتوانن هاوکاربن لە بەرەوپێشچوونی خزمەتگوزارییەکان و دڵنیابوونەوە لە خزمەتکردن بە زۆرترین منداڵ لە هەرێمی کوردستان. 

منداڵپارێزی کوردستان پابەندە بە بەردەوام بوون لە کاری هاوبەش لەگەڵ تیمە نێودەوڵەتییەکان بۆ دڵنیا بوونەوە لە فەراهەمکردنی ژیانێکی تەندروست بۆ هەموو منداڵێک بێ جیاوازی.

چەمچەماڵ - ١٥ تەموز، ٢٠٢٥

لە ڕێکەوتی ١٥ی تەمموزی ٢٠٢٥  سەنتەری چالاکی گەنجانی سەر بە منداڵپارێزی کوردستان لە شۆڕش لە چوارچێوەی هەڵمەتی ”بەڵێ بۆ ژیان، نەخێر بۆ ماددەی هۆشبەر" یاریەکی دۆستانەی ئەنجامدا لە یاریگای فەخرالدین تیلەکۆی.

ئامانجی لەم چالاکییە تیشک خستنەسەر گرنگی ڕۆڵی وەرزشە بۆ هاندانی گەنجان لە پێناو گرتنەبەری شێوازی ژیانی تەندروست و ڕێگریکردن لە بەکارهێنانی ماددە هۆشبەرەکان، هەروەها هەنگاوێکی گرنگ بوو بۆ هۆشیارکردنەوەی کۆمەڵگا دەربارەی خراپ بەکارهێنانی ماددە هۆشبەرەکان.

یاریزانەکان تیشێرتی وەرزشیان لەبەرکردبوو کە پەیامی دژ بە بەکارھێنانی ماددەی ھۆشبەریان لەسەر نوسرابوو، هەروەها بینەران ئەو بابەتە زانیارییانەیان دەخوێنەوە کە مەترسییەکانی ماددە هۆشبەرەکانیان دەخستە ڕوو و جەختیان دەکردەوە سەر گرنگی بڕیاردانی ئەرێنی لە ژیاندا.

لە هەمان کاتدا بە شێوازێکی فێرکاری ڕوون و سادە زانیاری بەخشرا بە ئامادەبووان دەربارەی بابەتەکە. ئەمەش بووە  هۆی فەراهەمکردنی ژینگەیەکی ئارام بۆ تاوتوێکردن و ئاڵوگۆڕکردنی بیر و بۆچونە جیاوازەکان.

وەرزش دەتوانێت ئامڕازێکی باشبێت بۆ ھۆشیارکردنەوەی کۆمەڵگا و پەرەدان بە گیانی یەکگرتووی و گۆڕانکاری ئەرێنی.